მსხვერპლით დასრულდა ავტოსაგზაო შემთხვევა საგარეჯოში – გარდაიცვალა ქალი და დაშავდა 6 არასრულწლოვანი. შემთხვევა ცოტა ხნის წინ, ქალაქ საგარეჯოში, მესამე საჯარო სკოლის მიმდებარე ტერიტორიაზე მოხდა.
ადგილობრივების თქმით, სწრაფად მოძრავი “მიცუბიშის” მარკის მანქანის მძღოლმა, რომელსაც 1-ელი საჯარო სკოლის მოსწავლე მართავდა, საჭე ვერ დაიმორჩილა, ჯერ გზის ნაპირზე მდებარე თონეს, შემდეგ კი სხვა მსუბუქ მანქანას და იქვე მყოფ ქალს შეეჯახა.
ავტომობილს არასრულწლოვანი მართავდა, შესაბამისად მას არ ექნებოდა არც მართვის მოწმობა. თვითმხილველების ინფორმაციით, ავტომობილი ნაწილებად არის დაშლილი. მათი ინფორმაციით მანქანას ქალი კედელზე მიუჭყლეტია. შემთხვევის ადგილზე პოლიცია იმყოფება.
შინაგან საქმეთა სამინისტრომ, მომხდარზე, გამოძიება სისხლის სამართლის კოდექსის 276-ე მუხლით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას ითვალისწინებს.
